By John Iremil Teodoro
NAG-ULI liwan ako sa University of San Agustin, ang akën Alma Mater sa Siyudad Iloilo, para mag-panelist sa 22nd San Agustin Writers Workshop nga ginahiwat kadya nga semana maghalin kang Lunes, Enero 19, asta sa Miyerkoles, Enero 21. Ang lantipan nga dya ang sara sa mga gina-look forward ko gid kada tuig.
Ang pulo ka fellows kadya nga tuig amo sanday Albert Gerald Palmares (Poetry), Al Ryanne Gatcho (Fiction), Angel Marie Penano (Drama), Cybelle Rio Jhane Hembra (Tula), John Eric Geromiano (Bëgë nga Sugidanën), John Frederic Bugayong (Panaysayon), Keft Sobredo (Malip-ot nga Sugilanon), Kristin Joseff Gagajena (Poetry), Leigh Gabrielle Marie Vacio (Panaysayën), kag Michael Caesar Tubal (Creative Nonfiction).
Kadya nga tuig, si Noel Galon de Leon, manunudlo sa University of the Philippines Iloilo kag pabliser kang Kasingkasing Press ang Workshop Director. Ang imaw ko nga mga panelist amo sanday Isidoro Cruz, Dulce Maria V. Deriada, Early Sol Gadong, Elvie Razon-Gonzalez, kag Eric Divinagracia. Si May Ann Jaro kang English Department kang San Agustin ang Project Director.
Sa pagbukas kang lantipan, naglunsar kami kang walo ka libro kang mga alumni kang University of San Agustin, kag panelist, alumni, kag keynote speaker kang San Agustin Writers Workshop. Ang mga libro amo ang Augustine on the Hope of Groaning Creation: The Resurrection of the Body (University of San Agustin, 2026) ni Fr. Mamerto Alfeche, O.S.A., Bittersweetland, a Novel (Ateneo de Manila University Press, 2025) ni R. Torres Pandan, Buskad: Mga Sinulatan sang Hubon Manunulat (Hubon Manunulat, 2026) nga gin-edit ni Alice Tan Gonzales, Writing from Home: Endless Black Ink on Rice Paper (Sirena Books, 2025) nga gin-edit ni Isidoro Cruz, The Race to Uswag ni Elvie Victonette Razon-Gonzalez, Iloilo City on My Mind (Sirena Books, 2025) ni Alice Sun-Cua, Staged Confessions: A Journey Through Words, Voice, and Soul (Kasingkasing Press, 2026) ni Mary Anne Jaro, kag ang akën libro nga Mga Bulawan nga Bulak / Golden Showers: A Collection of Poems about Thailand (Pawikan Press, 2025).
Nalipay gid ako sa libro nga Buskad: Mga Sinulatan sang Hubon Manunulat. Ikarwa dya nga antolohiya kang grupo nga Hubon Manunulat nga kalabanan kang katapu mga abyan ko man. May mga bata ukon mga bag-o rën nga mga manunulat sa Hiligaynon nga may sinulatan sa antolohiya nga dya pareho nanday Liane Carlo Suelan, Domingo Aguillon III, kag Karen Francisco. Ang mga aktibo nga opisyal kang Hubon Manunulat nga may mga obra man sa libro pareho nanday Noel de Leon, kag May Anne Jaro nangin fellow kang San Agustin Writers Workshop. Amo gid dya ang una ko nga basahën pagbalik ko sa Manila.
Sa balik ukon pag-uli ko rëgya sa San Agustin Iloilo kada tuig para sa SanAg Workshop, madëmdëman ko gid pirme si Jigger. Tana ang boss ko kato sa Coordinating Center for Research and Publications rëgya sa San Agustin, kag tana man ang Executive Assistant to the University President. Very supportive si Jigger sa mga program sa sining kag kultura kag tëngëd kana, nangin posible ang pagtukod sa Fray Luis de Leon Creative Writing Institute kag ang importante kadya nga mga proyekto amo ang paglathala ng taunang jornal ng malikhaing pagsulat na SanAg na ako ang patnugot, at ang taunang San Agustin Writers Workshop na ako ang direktor. Nagtaliwan si Jigger kang pandemya. Kada agto ko dya sa San Agustin para sa workshop, daw nagadoble gid ang kahidlaw ko sa akën palangga nga abyan nga si Jigger.
Ika-22 ka tuig rën kang amën lantipan kadya nga 2026. Sangka ordinaryo rën lamang ako nga panelist kag amo gid man dya ang gusto ko nga papel. Maghalin kang nag-50 ako, nagaamat-amat rën ako slowdown sa mga bagay nga gusto ko gid sakëan kato. Mas gusto ko rën nga ibubo ang akën oras kag tiyempo sa pagbasa kag pagsulat.
Ang nami lang sa pagpungko bilang panelist sa sangka lantipan, ako mismo duro ang matun-an halin sa iban nga mga panelist kag sa mga fellow. Kadya nga tuig halimbawa, nangin madalëm ang diskusyon parte sa pagbëtang kang mga trigger warning sa mga sinulatan. Kon may nagpakamatay nga karakter, dapat may suicide trigger warning. May sangka fellow nga nagtudlo kanakën nga sa pag-type kang letra nga “ë,” i-long press ko lang ang letter e. Bongga! Mapadasig gid kadya ang pagsulat ko sa Kinaray-a! Insert icon pa abi ang ginahimu ko.
Nalipay lang ako gid ako hay ang sangka bagay nga gintinguhaan ko nga maumpisahan kato, asta kadya padayon man gihapon. Sobra rën sa darwa ka dekada ang nagligad kag buhi man gihapon ang SanAg workshop. Kag nagapasalamat gid ako sa mga prayle kang University of San Agustin sa padayon nga pagsakdag, pagtugro kang pondo, sa proyekto nga dya. Duro rën nga mga batang manunulat ang nangin mga hamtëng nga manunulat tëngëd sa lantipan nga dya.
Ang San Agustin Writers Workshop sangka nami nga halad bilang pagpasidëngëg kay San Agustin nga sangka sagad nga manunulat.
***
Si John Iremil Teodoro nga taga-San Jose de Buenavista, Antique sangka full professor sa Departamento kang Literatura kang De La Salle University sa Manila kon diin tana man ang direktor kang Bienvenido N. Santos Creative Writing Center. Nangin Sekretaryo Heneral tana kang Unyon ng mga Manunulat sa Pilipinas (UMPIL). Ginabaton na ang S.E.A. WRITE Award halin sa Kaharian kang Thailand katong 2019.
