Ni Early Sol Gadong
(Una sa 5 ka bahin)
PANDEMIC biker. Amo ini ang tawag sa amon nga mga nagsugod bisikleta sadtong pandemya. Masami nga may dala nga pagyaguta ang ini nga bansag. Daw ato bala nga wala sing kinamatarong ang mga tawo nga magsugod buhat sang isa ka butang tungod sa mga kahamtangan nga dala sang kabuhi. Sa matuod, wala ako sing labot sa suya nga kapid sang sini nga bansag. Anhon ko ina ya abi, kon sang pandemya gid man ako nagsugod magbisikleta?
Katol sa tiil ang nagduso sa akon nga magbisikleta. Katol nga indi mabulong sang Fungisol ukon Canesten, kundi katol nga maumpawan lang kon makagwa ako sa balay kag makahaklo sang preska nga hangin. Sang wala pa ma-lockdown ang bug-os nga pungsod tungod sa COVID-19, naandan ko na nga mag-jogging bilang ehersisyo. Bisan matulotibsol ang akon panglawason kag daw nagaumpok nga penguin ang akon itsura kon nagadalagan, malipayon ako kon sagunson ko nga matapak ang akon mga tiil samtang ginatamdan ang suba, talamnan, ukon mga tawo nga akon malabayan. Masami ko ini nga ulubrahon pagkatapos sang bug-os nga adlaw nga pag-ubra sa eskwelahan. Isa ukon duha lang ka libot sa malapit nga
Esplanade kag daw atong nagakapanas ang kalapyo sang akon hunahuna.
Ginkawatan ako sang sini nga kahigayunan sang nag-pandemic. Pilipinas ang isa sa mga pungsod nga may pinakamadugay nga mobility restrictions sugod sadtong Marso 2020. Wala labot sa pagtukod sang mga lockdowns nga indi masayran ang rason, may mga tampuhaw pa kita sadto nga mga pagsulondon. Sin-o ang malipat sang ginmando nga maggamit sang barrier ang mga nagaangkasanay sa motor? Sa bahin naman sang kadam-an, mapasugtan lamang ang paggwa kon may suksok nga face mask. Daw mabugto na gani ang akon ginhawa kon nagadalagan bisan hilway pa ang akon ilong, ano pa gid ayhan kon naga-face mask?
Sang medyo naghalog na ang pagbantay sa paggwa sa balay, didto na nakon nakita ang mga post sa Facebook sang mga nagabisikleta. May mga nagabisikleta agod magkadto sa ubra, may mga nagabisikleta agod mangompra, kag may mga nagabisikleta agod mag-long ride pakadto sa mga nagkalain-lain nga banwa sa gwa sang syudad. Naganyat ako sa akon mga nakita gani nagsugod na ako sa pagpangita sang sarang ko man magamit para sa mga amo sini nga kahigayunan.
