Ni Early Sol Gadong
(Ikatlo sa 5 ka bahin)
ISA sa mga nauso sa Iloilo sa tunga sang pandemya amo ang pagbarter.
Siguro tungod kay indi makalagaw-shopping ang mga Ilonggo kag ayhan sa kadugay sang ila pagtener sa ila mga balay, natukiban nila nga kadamo gali sila sang mga abubot nga indi kinahanglan, amo gani nga nauso ang pagbarter ukon pagbayluhanay sang mga pagkabutang nga wala sing involved nga kwarta. Kadamo sang akon mga nabarter sadto: bugas baylo sa camera, sushi bake kag siopao baylo sa akon mga libro, kag folding bed baylo sa akon daan nga cellphone.
Apang ang ginakabig ko nga pinakabongga ko nga nabarter amo ang bisikleta baylo sa manok!
Sang ginpost ko sa Facebook Group nga nagapangita ako sang mabarter sa akon sang bisikleta, gin-message ako sang akon abyan. May ara sya kuno sang daan nga surplus bike. Ginaulanan, ginainitan, kag ginatuktukan lang kuno kay wala man ginagamit sang iya hinablos. Ginpamangkot ko sya kon ano ang iya gusto baylo sa bike, kag nagsiling sya nga, “Kon may access ka sa bisaya nga pares nga manok, that would help our community project.”
May ara sya ginatukod sadto nga community garden kon diin ginpasugtan niya ang iya mga kasilingan nga tamnan sang linain-lain nga ulutanon ang gamayniya nga bakante nga lote.
“Kaluy-an nga makapangitlog ang mga manok kag makabulig sa mga taga-
diri.”
Insigida, nagpangita ako sang manugbaligya manok, nag-order sang tatlo ka pares, kag ginbarter ini para sa isa ka daan nga asul nga Japanese surplus bike. Indi matakos ang kalipay sang akon abyan, kag amo man ako.
Antes ko ginpauli ang akon bag-o (nga daan) nga bisikleta sa balay, ginpaislan ko anay ang iya sini mga tuktukon nga pyesa, ginpatinluan, kag ginpasigurado nga safe ini nga gamiton. Pagkasunod nga adlaw, natuman gid ang akon handom. Nagbisikleta ako halin sa balay pakadto sa downtown, nagpondo para makasulo-selfie, kag nagbalik man dayon pauli.
Sugod sadto, halos adlaw-adlaw na ako nagabisikleta. Alas-singko pa lang sang kaagahon, nagabangon na ako kag nagahimos agod makasikad sang isa tubtob duha ka napulo nga kilometro sa dakbanwa sang Iloilo. Sa mga pagbisikleta nga ini, masami nga nagahapit ako sang ibos, suman, pansit, ukon pandesal nga palamahawon bag-o magsugod sa pag-atubang sa mga modules kag online class.
Ulihi ko na nadiparahan nga isa gali ini sa mga nangin epekto sa akon sang pandemya kag lockdown. Sadto abi, tuman gid sa akon kabudlay pabangunon kay maluyagon ako magligid-ligid sang madugay sa katre. Apang sa tunga sang pandemya, indi na ako makatulog nga lapaw sa alas-singko. Dumdom ko, excited lang ako magbisikleta. Gali kay amo na sadto ang akon pamaagi nga makapalagyo sa kagalong sang mga kabalaka sa akon hunahuna.
Loop ang akon ruta sa matag adlaw. Buot silingon, mahalin ako sa balay, makadto sa downtown paagi sa Muelle kag mabalik sa balay. Kon kaisa, halin sa balay, mapa- Diversion paagi sa kalye Gen. Luna, maliko pa-Jaro, kag mabalik sa balay. Matapos ko ang kada loop nga indi maglapaw sa isa ka oras. Isa ka oras ini sang kahilwayan halin sa katagam kag kabalaka. May mga tion nga nagakadakpan ko ang akon lawas nga nagapanumdom: Paano abi kon dire-diretso ako magbisikleta kag indi magbalik? Paano abi kon mauntat ako sa hotel, ukon resort, kag magtener lang didto bilog nga adlaw? Ukon bilog nga semana? Ukon bilog nga bulan?
Malungo-lungo lang ako dayon maliko pabalik sa balay agod atubangon ang pag-update sa mga tulun-an sang akon kabataan sa buluthuan, pag-meeting sa mga kaupod nga mga manunudlo, kag pagplano kon ano naman ang digamohon para sa panyapon.
May kalapyo ko nga tapuson ang adlaw apang bag-o ako maghigda, himuson ko anay ang akon suloksukon para sa akon pagbisikleta sa masunod nga kaagahon. I-set ko ang akon alarm, bisan pa nahibaluan ko nga maunahan ko man ini sa pagbugtaw, kag mapadayon sa kapiyongon. May kadali nga pagpakigdumog sa mga madulom nga panghunahuna tubtob sa kadalag-an sang katulogon. Sa masunod nga adlaw, liwaton ko naman ang akon ginakabig nga routine:
mabisikleta, mapamahaw, maubra, madigamo, matulog. Daw loop nga kaangay sang mga ruta nga akon ginaagyan magbisikleta.
