INDI MATUOD: Magapanagtag si Presidente Duterte sang ayuda nga naga balor ₱10,000 sa kada pamilya bag-o siya mag panaog sa pwesto
Peke ang link nga nagalapta sa Facebook. Wala sang anunsiyo gikan sa Malacañang ukon kay Presidente Duterte mismo natuhoy sa tinutuyo nga hatagan sang ₱10,000 nga ayuda ang kada pamilya bag-o siya mag panaog sa pwesto sa katapusan sang Hunyo.
ANG PASUNI: May ayuda nga ₱10,000 nga igapanagtag si Presidente Rodrigo Duterte sa kada pamilya bag-o matapos ang iya termino sa Hunyo 30.
INDI INI MATUOD.
ANG KAMATUORAN: Wala basehan ang link nga nagalapta sa Facebook tuhoy sa plano nga pagpanagtag ni Presidente Duterte sang ayuda nga ₱10,000 sa kada pamilya bag-o siya mag panaog sa pwesto. Wala snag opisyal nga anunsyo gikan sa Malacañang kag wala man ini nabalita sa mga lehitimo nga news organizations.
NGA-A KINAHANGLAN I-FACT-CHECK: Ginatuntuhan lamang ang mga nag komentar kag naghatag sang ila personal nga mga detalye sa nagalapta nga Facebook post.
MGA DETALYE
Nahibaluan nga ang Facebook page nga ginahingalanan “Bbm 31m Ayudamo” ang nag post sang laragway sadtong Hunyo 12, nga nagasambit nga magapanagtag sang bulig ukon ayuda nga ₱10,000 si Presidente Rodrigo Duterte sa tagsa ka pamilya bag-o matapos ang iya termino.
Makita sa graphic ang laragway ni Duterte kag ini nagasambit sang mga tinaga nga “PRES. DUTERTE 10K AYUDA Bago Ako Bumaba Sa Pwesto, mamimigay ako ng 10k Bawat Pamilya, paki message ang aking mga Staff sa link palista at 20 share.”
Ang caption sang post nagasiling “Sa Link po kayo palista at 20 share para mabigyan ng Ayuda https://bit.ly/38vUQZV.” Kung pinduton ang link, ini naga redirect sa https://ayuda-updates-2022.blogspot.com/.
Makita sa comment section nga nagahatag ang mga netizens sa ila personal nga mga impormasyon pareho sang ila ngalan, puluy-an, kag contact numbers.
Isa ini ka peke nga anunsiyo.
Ang Facebook page nga “Bbm 31 Ayudamo” ginbuhat sadto lamang Mayo, 23, 2022. Isa ini ka personal blog kag indi opisyal nga Facebook page ni Presidente Duterte. Diri man makita ang iba nga mga post tuhoy sa kuno pagpanagtag sang bulig, kwarta, kag balay gamit ang pondo sang gobyerno. Indi ini isa ka opisyal nga Facebook page ukon website sang kung ano man nga ahensiya sang gobyerno.
Nahibaluan pa nga ang link sa caption nga https://ayuda-updates-2022.blogspot.com/ , isa ka website nga naga gamit sang libre nga domain service provider. Kung sayuron, kaduda-duda ini bangud bisan sino kay pwede makabuhat sang page gamit ang libre nga service provider.
Wala sang may nakita ang Rappler nga opisyal nga pahibalo, balita, audio, kag video clips nga nagapamatuod sang sini nga huring-huring tuhoy sa pagpanagtag sang ayuda ni Duterte bag-o matapos ang iya termino sa katapusan sang Hunyo.
MARJUNE N. MUZONES, Intern sang Daily Guardian gikan sa sinulatan ni Owenh Jake Toledo sang Rappler.com: https://www.rappler.com/newsbreak/fact-check/duterte-will-give-financial-aid-per-family-before-term-ends/?fbclid=IwAR1q-mRMVSPyNOqeKo2UbB3jufU-1SNzVtFOJgnL6V67vJSccTzo3YCZFZI
