Base sa datos sang Bureau of Treasury, Department of Finance sadtong Abril 2022, naglab-ot na sa ₱12.763 trilyon ang kabilugan nga utang sang Pilipinas.
ANG PASUNI: Wala na sang utang ang Pilipinas.
INDI INI MATUOD.
ANG KAMATUORAN: Naglab-ot na sa ₱12.763 trilyon ang kabilugan nga utang sang Pilipinas, base sa datos sang Bureau of Treasury, Department of Finance sadtong Abril 2022.
NGA-A KINAHANGLAN I-FACT-CHECK: Makita ang nasambit nga pahayag sa titulo sang video nga gin-upload sa Youtube channel nga “Mimaa” sadtong Mayo 2022 kag linibo na ka mga netizens ang naka tan-aw sini.
MGA DETALYE
Nasambit sa titulo sang video nga gin upload sa Youtube channel nga “Mimaa” sadtong Mayo 2022 nga wala na utang ang Pilipinas. Ginpahayag nga nabayran na sang administrasyon ni Presidente Rodrigo Duterte ang tanan nga utang sang pungsod. Amu ini ang ang titulo sang video: “WALA NANG UTANG ANG PILIPINAS! BINAYARAN NA NI DUTERTE! KASO HINDI BINALITA NG ABS, GMA, RAPPLER.”
Indi matuod nga wala na sang utang ang Pilipinas. Siling sang datos gikan sa Bureau of Treasury sang Department of Finance, nag lab-ot na ang utang sang pungsod sa ₱12.763 trilyon.
Ginpakita man sa nasambit nga video ang isa ka artikulo sang Manila bulletin nga may headline nga “Gov’t settles 300-B central bank loan” nga gin sulat ni Chino S. Leyco sadtong Mayo 20, 2022. Ang ginatumod sang balita amu ang utang sang gobyerno sa Bangko Sentral ng Pilipinas (BSP) kag indi ang kabilugan nga utang sang pungsod. Ang bahin nga ina amu ang ₱300 bilyon nga utang sang gobyerno sa BSP nga ginbayaran na. Ini gin balita man sang Mayo 20 sa ABS-CBN News kag GMA News, indi santo sa titulo sang video.
Ginlubad ni Marjune N. Muzones, Intern, Daily Guardian gikan sa sinulatan Percival Bueser sang Rappler.com: https://www.rappler.com/newsbreak/fact-check/philippines-has-no-debt/?fbclid=IwAR0c0fCrdg3RfJbTjsQA4GAOIK28r9H9RRM2ACIhmrMkpu1u61jEEwsZPMg
